ನನ್ನೊಡನೆ ನಾನೊಮ್ಮೆ

ಮಸಸನ್ನು ಅದರ ಪಾಡಿಗೆ ಹರಿಯ ಬಿಟ್ಟಾಗ ಹುಟ್ಟಿಕೊಂಡ ಯೋಚನೆಯ ತುಣಿಕಿದು....

"ನನ್ನೊಡನೆ ನಾನೊಮ್ಮೆ"

ಅರರೆ ಯಾರದು ನನ್ನಡಿಯಲಿ
ನನ್ನ ಹಿಂಬಾಲಿಸಿ
ಕೇಳದೆ ನನ್ನನುಮತಿಯ
ಬಳಿ ಬರುತ್ತಿಲ್ಲವೇಕೆ, ನಾ
ಮರದ ನೆರಳಡಿ ಬರಲು?

ರುಂಯೆಂಬ ಗಾಳಿ ಮರವ
ತಬ್ಬಿ ಮುತ್ತಿಕ್ಕುತ್ತಿದೆ
ಮೆಲ್ಲಗೆ ಪಿಸುಗುಡುವಂತೆ ಗುಟ್ಟ!
ಇಟ್ಟ ಕಾಲ ಕಿತ್ತಿಟ್ಟು
ಹೊರ ನಡೆದೆ
ಮರದ ನಾಚಿಕೆಯ ನೋಟ
ನನ್ನ ನಾಚಿಸುವ ಮೊದಲೆ
ಅವಳ ನೆನಪಿನ ವರ್ಷ
ನನ್ನ ನೆನೆಯಲು ಬಿಡದೆ

ಕಾಲುಗಳು ಕಾಲುದಾರಿಯತ್ತ
ದೂರದಿ ಕಿರಿದಾಗುತ್ತ
ಮನದಿ ಹಿರಿದಾಗುತ್ತ
ನಡೆದಷ್ಟು ಕೊನೆಯಿಲ್ಲ
ಕೊನೆ ನನಗೆ ಬೇಕಿಲ್ಲ
ಗುರಿ ಇಲ್ಲದ ಪಯಣಿಗ
ಹೊಸ ಬದುಕಿಗೆ ವಲಸಿಗ

ಕೂತೆ, ದಣಿವು ದಿಕ್ಕು ತಪ್ಪಿಸಲು
ಒಳಗಿನ ಹೊಯ್ದಾಟ
ಮನವ ಬೀಳಿಸಲು
ವಿಶ್ರಾಂತಿಗೆ ಜೊತೆಗಾದ ಶಾಂತಿ
ಕಿಲಕಿಲ ಹಕ್ಕಿಗೆ ಕಲ್ಲೆಸೆವ ಯೋಚನೆ
ಜುಳು ಜುಳು ನೀರಿಗೆ ಮೈಯೊಡ್ಡುವ ಕಲ್ಪನೆ
ಅರಿವಿಗೆ ಬರುವ ಮೊದಲೆ
ನಾ ಬಂದಿ, ನಿದ್ದೆಯ ಸಿಹಿ ಅಪ್ಪುಗೆ

ಕೂತು ಉಸಿರೆಳೆಯುವಂತಿಲ್ಲ
ನನ್ನ ನಿಲ್ದಾಣದ ಸುಳಿವಿಲ್ಲ
ನಿಂತೆ, ಕಾಲೂರಿ ನೆಲದಿ ಗಪ್ಪನೆ
ಯೋಚನೆಗಳೆ ಹೆಗಲೇರಿಸಿ
ನೋವುಗಳ ಹಿಮ್ಮೆಟ್ಟಿಸಿ
ಮತ್ತೆ ತಿರುಗಿ ನೋಡಿದರೆ
ಮತ್ತದೆ ಬೆನ್ನ ಬಿಡದ ನೆರಳು
ಬಿಡದೆ ನೆನಪಾಗಿ ಕಾಡುವ ಅವಳು


ದಿನಾಂಕ: ಜನವರಿ ೫, ೨೦೦೯